كنت وعدتكم اني اشرح مفهوم و مبدأ علم الجرافولوجي
عارفين علم الجرافولوجي دة بيعتمد على اية ؟
بيعتمد على رسائل المخ اللي بتوصل للإيد و تقولها تكتب إزاي و دة اللي يهمني لإن دي هي اللي تعتبر بصمة لشخصيتك و مبيهمنيش رسائل المخ اللي بتقول تكتب إيه ؟
يعني الجرافولوجي بيعتمد على شكل الحروف مش على الكلام المكتوب .
طيب إزاي دة بيشتغل ؟
لما كنا صغيرين كانوا بيعلمونا إزاي نكتب أو ننقش الحروف و يخلونا نعيدها كذا مرة و ساعتها مكناش بنفكر بنكتب إيه لكن كان يهمنا نكتب الحروف صح زي ما إتعلمناها و لما كبرنا بقينا مبنفكرش بنكتب إزاي لكن بنفكر بنكتب إيه لإن خلاص شكل الحروف اتحفر في المخ و بقى زي بصمتنا هو دة اللي بيعتمد عليه الجرافولوجي شكل الحروف.
المطلوب في عينة الكتابة علشان يطلع التحليل صح ؟
كتابة ما لا يقل عن ٦ سطور و دة لية ؟
علشان لو حاولت تبهر اللي قدامك بخط جميل في اول كام سطر هتلاقي المخ تعب لإنة بيحاول يغير بصمتة و مجبر فبيبدأ يرجع للبصمة تاني.
ممنوع تنقل من حاجة طيب دي لية دي كمان ؟
علشان لما بتنقل بييجي عليك وقت تقف و لو للحظات علشان تقرا اللي هتكتبة فبالتالي بيبان عندي في التحليل الوقوف و دة له تفسيرات كتيرة في التحليل فلو انت مش من طبعك إنك تقف تفكر و كان الوقوف لمجرد القراية يبقى تحليلك مش هيطلع صح .
لازم و أنت بتكتب تكون إيدك مرتاحة و في وضعها الطبيعي يعني مش مثلا بتكتب ورا حد في محاضرة بسرعة جدا مع العلم إن فية صفات مش هتتغير حتى و أنت سريع لكن نسبة وجود الصفة ممكن تتغير فبالتالي التحليل مش هيكون دقيق اوي.
يا سلام لو مضيت كمان في نهاية الورقة .
طيب لية دي كمان ؟ علشان الإمضاء بتحدد صفات معينة زي مثلا علاقتك بعيلتك و بنفسك.
لازم الحاجة اللي بتكتبها تكون من دماغك و تسترسل فيها علشان أعرف حبل أفكارك متواصل و إلا بيتقطع ساعات.
الورقة كمان بتفرق و القلم ؟
أكيد بتقولوا انتي بتصعبيها و ساعات كنا بنبعت لك ورق تحللية و مكنتيش محبكاها اوي كدة .
هقول لكم الفرق :
لما حد بيبعت لي ورقة مكتوبة بقولة لازم أشوف اصل الورقة و لو غير متاحة او ناقص فيها شرط من الشروط بقولة إن التحليل في نظري مش كامل ، الورق بيفرق لإن فية واحد بيحب يكتب في ورق مسطر و فيه بيحب يكتب في ورق مش مسطر وكل واحدة لها علاقة بشخصيته.
كمان لازم تكتب بالقلم اللي يريحك لإن فية ناس بتكتب بالرصاص و فية ناس بتكتب بالجاف و مش اي نوع.
لازم اعرف النوع و السن علشان لو فية بعض الأمراض في كبار السن بتبان عندي في التحليل و ممكن تظهر بدري في سن أصغر و كمان كتابة الراجل غير الست و دي بتوصف لي جزء من الشخصية برضو.
اية اللي هنستفيدة من علم الجرافولوجي ؟
تحليل الشخصية لمعرفة نقاط القوة و الضعف فيها .
تحليل الشخصية للمقبلين على الزواج لمعرفة نسبة التوافق بين شخصياتهم
تحليل الشخصية للمتزوجين لمعرفة نقاط الالتقاء في التفكسر بينهم لحل الازمات و الخلافات.
تحليل الشخصية لفريق العمل الواحد لمعرفة مدى توتفق فريق العمل لتلافي المشكلات.
تحليل الشخصية للمراهقين لمعرفة طرق التفكير و كيفية التعامل معاهم.
تحليل الشخصية للمتقدمين لأي وظيفة لوضع الرجل المناسب في المكان المناسب بما يوافق قدراتة و شخصيتة.
تحليل الشخصية للمديرين خاصة و ذلك لتحقيق أقصى إستفادة للشركات.
تحليل الشخصية كامل من الخط لتحديد ميول الطالب و مساعدتة في إختيار الدراسة المناسبة لشخصيتة .